“Rio Tinto” группийн шинэ гүйцэтгэх захирал ажлаа хүлээн авлаа

“Rio Tinto” группийн шинэ гүйцэтгэх захирал Жан- Себастьян Жак бямба гарагт ажлаа хүлээн авч, группийн түүхэн дэх хамгийн залуу гүйцэтгэх захирал боллоо. Тэрбээр ажлаа хүлээн авсан өдрөө өнөөдрийн төслүүдээ үргэлжлүүлж, бүтээмжээ дээшлүүлэхэд анхаарна гэдгээ мэдэгджээ. Харин шинжээчдийн таамаглаж байсанчлан нэгдэн нийлэх хэлцэл ойрын хугацаанд хийхгүй байж магадгүй байна. Жан-Себастьян Жак “Нэгдэн нийлэх хэлцэл өнөөдрийн гол зорилго биш. Хувьцаа эзэмшигчдэд үнэ цэн бий болгож чадах уурхай зөв үнээр олдохгүй бол худалдан авахгүй” гэжээ. Хэдий тийм боловч зэсийн уурхай худалдан авч магадгүй гэх утга бүхий мэдэгдэл хийжээ. Ямар ч байсан зэсийн хувьд голлох эрдэс бодисуудаас хамгийн түрүүнд нийлүүлэлтийн илүүдлээс гарна гэж таамаглаж байгаагаа тэрбээр илэрхийлсэн байна. Үүнээс гадна тус групп ашиг багатай бизнесүүдээ үндсэн бизнесээсээ салгаж, тусад нь гаргана гэсэн таамгийг үгүйсгэжээ.