Замын түгжрэлээс эрчим хүч үүсгэнэ

Эрчим хүч хуримтлуулах зам зардлаа нөхөж чадах эсэхэд эдийн засагчид эргэлзэж байна

Замын түгжрэлээс эрчим хүч үүсгэх арга нь үл бүтэх санаа биш болохыг тус муж улсын Эрчим хүчний комиссын орлогч захирал Майкл Грэйвли тайлбарлав. “Зам дээгүүр автомашин явах, түгжрэл дунд зогсох үед үүсдэг эрчим хүч чичиргээ болон дулааны хэлбэрээр сарнин алга болдог. Зөвхөн Калифорни муж улсаар жишээ авахад л ийм эрчим хүчийг хуримтлуулах боломж маш их. Бид ойрын ирээдүйд энэхүү сул эрчим хүчийг хуримтлуулах аргыг олж чадах болов уу” хэмээн тэрбээр өгүүлж байна.

Жолоо барих нь зөвхөн эрчим хүч хэрэглэдэг бус, үүсгэдэг ажил болж хувирах талаар технологийн судалгааны байгууллагын ажилтан Пол Банжи тайлбарласан юм. Тэрбээр, өмнө нь Лос Анжелес дахь Калифорнийн их сургуулийн дэргэдэх Уур амьсгалын өөрчлөлтийг шийдвэрлэх төвийн захирал байсан билээ.

Түүний санаа нь пьезоцахилгаан буюу хөдөлгөөн, даралт зэрэг механик үйлчлэлээс үүссэн эрчим хүчийг цахилгаан гүйдэл болгон хувиргах үүрэгтэй төхөөрөмж ашиглах явдал. Ийм төхөөрөмж ашиглан үйлдвэр, аж ахуйн газрын цахилгаан хэрэглээг мэдэгдэхүйц бууруулах боломжтой эсэх судалгааг сүүлийн үед их хийх болсон. Үүний зэрэгцээ пьезоцахилгаан төхөөрөмжийг хувцас, гутлын уланд ашиглах замаар ухаалаг утас зэрэг мобайл төхөөрөмжийг цэнэглэж болох аж.

Эрчим хүч үүсгэдэг замын ашгийг тооцож үзэх зорилгоор Калифорни муж улсын удирдлага, эрдэмтдийн баг хоёр сая ам.долларын хөрөнгө оруулжээ. Израйльд хэдэн жилийн өмнө үүнтэй төстэй төсөл хэрэгжиж эхэлсэн ч, амжилтгүй төгссөн түүхтэй.