Цайрын ханш 3000 ам.доллар давж, 2007 оноос хойших дээд цэгтээ хүрлээ

Цайрын ханш 3000 ам.долларыг давснаар 2007 оноос хойших дээд цэгт хүрлээ. Лондонгийн металлын биржид цайрын ханш 5.8 хувь өссөнөөр тонн тутамдаа 3132 ам.долларт хүрсэн юм. Үүнээс гадна хөнгөн цагааны ханш 2.7 хувиар өсөж, 2014 оны есдүгээр сараас хойших дээд цэгт хүрчээ. Мөн Лондонгийн металлын биржид никель, зэсийн ханш ч өсөлттэй байгааг онцолж болохоор байгаа юм. Ингэснээр суурь металлын ханшийн индекс сүүлийн хоёр жил гаруйн дээд цэгт хүрч нэмэгдлээ. Ийнхүү металлуудын ханш өсөлттэй байгаа нь нэг талаас нийлүүлэлт буурч, БНХАУ-ын эрэлт нэмэгдэж байгаатай холбоотой юм. Урд хөршийн хувьд хорт хийн ялгаруулалт болон үйлдвэрүүдийн хэт ачааллыг бууруулахын тулд хөнгөн цагаан болон гангийн зарим үйлдвэрүүдийг хаахаар болсон. Энэ нь тус улсын эрэлт нэмэгдэхэд нөлөөлж байна. Үйлдвэрлэлийн металлуудын ханш ийнхүү нэмэгдсэн нь “Glencore”, “Alcoa” тэргүүтэй уул уурхайн компаниудын хувьцааны ханш дөрвөн хувийг давж өсөхөд нөлөөлжээ.