Гүйцэтгэх ажиллагааны зардалд аудит хийнэ
Ерөнхийлөгчийн сонгуулийн зардалд аудит хийхээр төлөвлөжээ
Үндэсний аудитын газар ирэх онд “Оюутолгой”, “Эрдэнэс Тавантолгой”, Засгийн газрын авто бааз, Иргэний нисэхийн ерөнхий газар, Ашигт малтмал, газрын тосны газар болон Ерөнхийлөгчийн сонгуулийн зардалд хяналт хийхээр төлөвлөжээ. Мөн АСЕМ-ийн үйл ажиллагааны тайлан, Төрийн орон сууцны корпораци болон Батлан хамгаалах яамны хөрөнгө оруулалтын зардалт аудит хийнэ. Аудитын зардалд 700 гаруй сая төгрөг шаардагдах юм байна. Энэ талаар Төсвийн байнгын хорооны өчигдрийн хуралдаанаар хэлэлцсэн юм.
Ерөнхий аудитор Д.Хүрэлбаатар хуралдааны үеэр “Үндэсний аудитын газарт үүрэг хүлээлгэсэн аудитын сэдвийг эхний ээлжинд сонголоо. Төрийн аудитын байгууллагаас эрүүл мэнд, боловсролын салбарын тогтолцоонд ойрын дөрвөн жилд багтаан иж бүрэн аудит хийхээр төлөвлөж байгаа бөгөөд “Төрөөс бага боловсрол олгож байгаа өнөөгийн байдал, үр нөлөө, “Төрөөс эмийн талаар баримтлах бодлогын хэрэгжилт”, “Эмийн эргэлтийн сангийн үйл ажиллагаа” сэдвээр аудит хийхээр төлөвлөсөн” гэжээ.
Харин хэлэлцүүлгийн үеэр УИХ-ын гишүүд аудитын сэдэв хангалтгүй байна хэмээн шүүмжилж байлаа. Тухайлбал, УИХ-ын гишүүн Ч.Улаан “Аудитын байгууллага гишүүдийн захиалгаар аж ахуйн нэгжтэй ноцолдвол хайран цаг хугацаа зарцуулсан болно. “Эрдэнэс Тавантолгой” компанитай ноцолдох ямар хэрэгтэй юм. “Эрдэнэс Монгол” гэж зээл авч өр тавьдаг газар байна. Хэд, хэдэн компанийн хувьцаа эзэмшдэг газар. Ямар үйл ажиллагаа явуулдаг нь ойлгомжгүй” гэлээ. Мөн өмнө хийсэн аудитын үр дүн гарахгүй байгааг ч шүүмжлэв. Ингээд УИХ-ын гишүүдээс гарсан саналын дагуу ирэх онд хийх аудитын шалгалтыг оновчтой болгож багцлахаар боллоо.
Аудитын зардалд 700 гаруй сая төгрөг шаардлагатай.
- Шинэ
- Их уншсан
- Их сэтгэгдэлтэй