5776

“Амгалан” амаржихыг түгшээсэн “Хаанчлал”

ЗГМ: Сэдэв


Төрөх эмнэлгийн орчинд согтуучууд хөлхөж, архи, шивтэр нэвт сэнгэнэнэ


Гуравдугаар төрөх буюу “Амгалан” амаржих эмнэлэг дөрвөн жилийн өмнө газар байраа ашиглалтад оруулсан. Хуучин төрөх эмнэлэгт жилдээ 6000 эх төрдөг байсан бол одоо 9000 эхийг хүлээн авч үйлчлэх хүчин чадалтай болсон нь эрүүл мэндийн салбарын эх үрсийн төлөө хийсэн том ололт юм. Гэтэл шинэ амаржихын баяр хөөрөөс ард түмэн хуваалцаж, үйлчилгээ авч амжаагүй байхад эмнэлэг үйл ажиллагаагаа хэвийн явуулах аргагүй болж, хөндлөнгөөс учруулж буй бэрхшээлийг хэрхэн шийдэхээ мэдэхгүй сууна.


Эмнэлэг тэр дундаа эх амаржиж, хүүхэд мэндэлж буй орчин аюулгүй, тав тухтай, дуу чимээ багатай байх ёстой. Гэтэл энэ эмнэлэг үйлчлүүлэгчдийнхээ тав тухыг хангаж чадахаа байжээ. “Амгалан” амаржихын хажуу бөөрөнд хачиг шиг наалдсан “хаанчлал” нэртэй караоке, паб, зочид буудлын чимээ шуугиан жирэмсэн эмэгтэйчүүд, эмч, сувилагч нарыг ядаргаанд оруулж байна. Төрөх эмнэлгийн үүдээр согтуу залуус эргэлдэж, нус, цэрээ хаях нь хэвийн үзэгдэл болжээ. Тэд эмнэлгийн булан тохойд хүндэрч, эргэн тойрныг нь бохирдуулж, эмнэлгийн ажилчдыг цөхрөнгөө барахад хүргэж байгаа юм. Ийм байж болох уу? Адаглаад нэр нь “хаанчлал” аж. Үнэхээр ч тус пабын үйлчлүүлэгчид эмнэлэгт “хаанчилж” Амгалан амаржих өдөр бүр түгшүүртэй байдаг тухай нэгэн эх сурвалжийн мэдээллийн мөрөөр бид сурвалжиллаа.


Манай сурвалжлах багийг “Амгалан” амаржихад очиход шөнийн 01.30 цаг болж байв. Их хотын иргэдийн хөл татарч, замын хөдөлгөөн ч багасчээ.  Харин энд эсрэгээрээ. Хөгжмийн нүсэр дуу чимээ нүргэлж, элдэв өнгийн машин сүлжилдэн, халамцуу залуус хашгиралдсан дүр зураг угтлаа. Байсхийгээд гялгар тор дүүрэн архи, шар айраг барьсан залуус мөнөөх пабаас гарч ирэх юм.


“Хаанчлал” пабынхан машин орох хашааг хааснаас болж, үйлчлүүлэгчид амаржих эмнэлгийн зогсоолыг эзэгнээд зогсохгүй түргэний тэрэг ордог замыг нь хаажээ. “Хаанчлал” пабын энэ ноёрхол эмнэлгийнхэнд үнэхээр дарамт болж байна.


“Хаанчлал”-д хууль үйлчилдэггүй


Бид “Амгалан” амаржихын эх баригч Э-тэй уулзаж үүсээд байгаа нөхцөл байдлын талаар тодрууллаа. Тэрбээр “хаанчлал орой 12.00 цаг гээд дэлгүүр шиг архи зардаг. Сар бүрийн 31, нэгний өдрүүдэд архи зарахыг хориглосон хуультай. Гэтэл энэ газарт хууль огт үйлчилдэггүй. Өдөр бүр л хэрүүл, зодоон болно. Хөлчүү залуусын ёс бус үйлдэл үнэхээр хэцүү.


Эмнэлгийн хана, хажуугийн мөнгөний машиныг нүдэж, балбаад амраадаггүй. Төрөх гэж ирсэн эхчүүд дуу чимээнээс нь залхдаг. Дөнгөж төрсөн нялх хүүхдүүдийг ч амар тайван унтуулахгүй юм. Жирэмсэн ээжүүд гарч агаар, салхи амьсгалах эрхтэй. Гэвч согтуу залуусаас айж эмээгээд гарч чадахгүй байна. Ээжүүдээс эмнэлгийн захиргаанд тус газартай холбоотой гомдол байнга ирдэг. Үүрийн зургаан цаг хүртэл хүмүүс дуулж, хашхираад байхаар хэн тайван амрах билээ. Өглөө эрт үүдний сандал согтуу залуусын амрах газар болдог. Эмнэлгийн хонгилд тавьсан эд зүйлсийг хэмхэлчих вий л гэж санаа зовнидог


Манай эмнэлгийн өмнөх талбайд халамцуу залуу шээж байхад нь шаардлага тавьснаас болж, эх баригч эмч гараа хугалуулж байсан удаатай. Энд удвал их зүйл харна даа” гэсэн юм.

Шөнийн 03.00 цагт согтуу үйлчлүүлэгчид АТМ-ээс мөнгө авахдаа хоорондоо маргаж улмаар заамдалцан, цохилцоод авлаа. Хүлээн авахын үүдэнд шинэ хүнээ хүлээх ар гэрийнхэн уцаарлаж, сувилагч тэднийг гаргасан юм. Харин ч өнөөдөр гайгүй байна хэмээн инээмсэглэх залуу сувилагч “хаанчлал”-ын дуу чимээнд дассан бололтой.

Эхчүүдээс сэтгэл ханамжийн судалгаа авахад чимээ шуугианаа намдаагаач гэдэг

Гадаа орилолдох залуусын чимээг тээршаасан хэн нэгний “Чимээгүй байгаач хүүхэд унтаж байна” гэх дуу эмнэлгийн дөрөвдүгээр давхраас сонсогдлоо. “Хаанчлал” пабын харалдаа болохоор хүлээн авах, нялхсын, төрөх, төрөхийн өмнөх болон хагалгааны тасгуудын үйлчлүүлэгчид амар тайван байдаггүй аж. Мөн баасан гараг болон баярын өдрүүдэд бүр ч түвэгтэй байдаг тухай эмнэлгийнхэн хэлж байв.

Цонхоор агаар биш архи сэнгэнэнэ

Амаржихын үйлчлүүлэгч Б.Буянхишиг “Амаржихад ирээд долоо хонож байна. Эмчилгээ, сувилгаа сайтай ч нэг асуудал нь хажуу талдаа паб, караокетой.  Үүр шөнийн таван цаг хүртэл согтуу, хөлчүү хүмүүсийн дуу чимээ тасрахгүй. Нойр хулжиж, цочиж сэрдэг. Бас зуны халуунд цонхоо нээхээс өөр аргагүй. Гэвч архины эхүүн үнэрт хамар цоргиод дотор муухайруулаад байдаг юм. Энд хоёр хүн нэгнийгээ алах гээд байна хэмээн цагдаад дуудлага өгөхөд тоогоогүй. Эхчүүд төрж, нялхас амарч байгаа газрын дэргэд паб, үйлчилгээний газар ажиллуулах зохимжгүй л баймаар юм” хэмээн санаа алдан хэллээ.

Нийслэлийн хэмжээнд баар, рестораны чиглэлээр үйл ажиллагаа эрхэлдэг 1500 гаруй аж ахуйн нэгж бий. Эдгээр газар үүрийн шөнийн 04.00 цаг хүртэл ажилладаг байлаа ч эмнэлгийн ойролцоо байрлаж боломгүй. Хуульд эмнэлэг сувиллын газар тэдгээрийн гаднах орчинд тамхи татахыг хориглосон ч тус хуулийн заалт хэрэгжихгүй байгаа хэмээн эх сурвалж мэдээлж байлаа. Мөн Нийслэлийн Засаг даргын тамгын газарт иргэнээс амаржих газрын замыг хааж машин зогссон тухай гомдол ирж шийдвэрлэж байжээ. Гэвч энэ явдал удаа дараа давтагдсан хэвээр л байгаа аж.

Түргэний машины хангинах дохио, согтуу залуусын шуугиан, зодоон, анхны хүүхдээ өлгийдсөн аавын баяр, амар амгаланг хайсан жижүүр эмч, сувилагч, дүүгээ хүлээсэн хүүхдүүд болон амрахыг хүсэж гомдоллосон ээжүүд гээд амьдралын олон өнгө сүлэлдсэн амаржих газрын нэг шөнийг үдлээ.

• “Хаанчлал” пабынхан машин орох хашааг хааснаас болж, үйлчлүүлэгчид амаржих эмнэлгийн зогсоолыг эзэгнээд зогсохгүй түргэний тэрэг ордог замыг нь хаажээ.

• Манай эмнэлгийн өмнөх талбайд халамцуу залуу шээж байхад нь шаардлага тавьснаас болж, эх баригч эмч гараа хугалуулж байсан удаатай. Энд удвал их зүйл харна даа” гэсэн юм.

• “Хаанчлал” пабын дөрвөн ханан дундах хэтэрсэн архидалт, дайрч давшилсан маргаан зэрэг төрийн хуулийг уландаа гишгэсэн үйлдэлд арга хэмжээ авахгүй, мөнгөнд сохорсон албан тушаалтнаа хаацайлсаар.

Гаднах талбайг архи ууж, тамхи татах газар шиг ашигладаг болсон

Бид мөн “Амаржих” газрын аж ахуйн менежертэй уулзсан юм. Тэрбээр “холоос ирсэн үйлчлүүлэгчдийн хэрэгцээ шаардлагад тулгуурлан үйлчилгээг цогцоор нь бүрдүүлэх зорилгоор ТҮЦ машин, АТМ байрлуулсан. Гэвч шөнийн цагаар уг АТМ пабын үйлчлүүлэгчдийн хэрэглээ болж, эхчүүдийн тайван байдал алдагдаад байна. Энд дүрэм журам алга. Залуус машинаа түргэний машины замд орхичих нь хүндрэл учруулах юм. Манайх гадна талбайг эхчүүддээ зориулж нийслэлийн хөрөнгө оруулалтаар тохижуулж сүүдрэвч, саравч барисан. Гэтэл залуус цугларч архи ууж, тамхи татдаг газар болчихлоо. Сэтгэл ханамжийн судалгаа эхчүүдээс авахад чимээ шуугианаа намдаагаач л гэдэг. Эмнэлэг гэдэг тусгай объект байх ёстой. Манай цонхыг хагалж, араас нь хөөцөлдөн төлүүлж байсан удаатай “өмнө нь энэ “хаанчлал”-ын байр эмнэлгийн угаалгын газар байсан юм” хэмээв.

“Амгалан” амаржих газар нэг, хоёрдугаар төрөхөөс орчин үеийн тоног, төхөөрөмж, эх хүлээн авах хүчин чадлаараа хоёр дахин илүү шинэ байр ашиглалтад оруулж, эмнэлгийн цогц үйлчилгээг бүрдүүлсэн. ийм сайхан байр бариад ч хэрэг алга. орчин гэдэг иргэдийн эрүүл мэндэд хамгийн хамаатай зүйл. Гэтэл төрөх эмнэлгийн орчин нь тайван бус болчихоор жирэмсэн эмэгтэйчүүд адаглаад л сэтгэл түгших эмгэгтэй болж байгаа юм. Ер ийм газар удаан хугацаагаар хэвтэж эмчлүүлэх ч арга алга. Эмнэлгийн ажилчид энэ асуудлыг шийдвэрлэж өгөхийг хүссэн албан бичгийг өнгөрсөн оны есдүгээр сард хотын захиргаанд хүргүүлсэн хариу өгөөгүй аж.

Төрөх эмнэлгийн ажилтнууд “хаанчлал” пабын эзэн нэлээд эрх мэдэлтэй албан тушаалтан байдаг гэнэ лээ гэж сэтгэл гонсгор хариулсан юм. тэвчих, хүлээхийн заагт эмнэлгийнхэн гарцгүй болжээ.

Түүнчлэн Баянзүрх дүүргийн цагдаагийн нэгдүгээр хэлтсийнхэн “хаанчлал” пабын дөрвөн ханан дундах хэтэрсэн архидалт, дайрч давшилсан маргаан зэрэг төрийн хуулийг уландаа гишгэсэн үйлдэлд арга хэмжээ авахгүй, мөнгөнд сохорсон албан тушаалтнаа хаацайлсаар. Нийслэлийн тамгын газар, цагдаа нар нь ч хяналт тавьж чадахгүй, айж дагжсан “хаанчлал” ингэхэд хэний паб вэ? Амаржихын ажилчид, хэвтэн эмчлүүлэгчид “хаанчлал”-аас салах өдрийг хүлээж сууна. Хувийн өмч, орлогын үүсвэрийг шууд хааж болохгүй ч хорвоод мэндлэх бяцхан үрсийг тосож өлгийддөг эмнэлэг баар, цэнгээний газартай хөрш оршиж боломгүй. Нийтийн эрх ашиг хөндөгдсөн асуудлыг анхаарахгүй хоосон хөгжил, дэвшил ярьж суух нь оновчгүй юм. Үүнийг Нийслэлийн захирагч, Эрүүл мэндийн сайд, улаанбаатар хотын ерөнхий менежер, НМХГ хуулийн дагуу анхааралдаа авах цаг болжээ. Эрх мэдэл, танил тал энэ оронд хэзээ хаанчлахаа болих вэ?

САНАЛ БОЛГОХ
Та утсандаа UB Info апп суулгаад мэдээгээ утаснаасаа уншаарай
Засгийн газрын мэдээ