“Tesla” компани нарны хавтангуудаа “Home Depot“-оор худалдана

“Tesla” компани нарны эрчим хүчний бүтээгдэхүүнүүдээ жижиглэн худалдааны томоохон дэлгүүрүүдийн нэг болох “Home Depot“-оор худалдаж эхлэхээр болсон байна. Энэ нь тус компани сэргээгдэх эрчим хүчний бүтээгдэхүүнүүдээ хөгжүүлэх томоохон туршилтаа эхлүүлэх алхам болж байгаа аж. Цахилгаан автомашинаараа олонд танигдсан технологийн “Tesla” компани “Home Depot”-ийн 800 орчим салбар дэлгүүрт нарны хавтан, “powerwall” цэнэг хураагуур зэрэг брэнд бүтээгдэхүүнүүдээ худалдана.

Энэ худалдааг “Tesla”-ийн ажилтнууд өөрсдөө хийнэ гэдгээрээ онцлог юм байна. Үүнээс гадна “Home Depot”-ийн дараа улсдаа жижиглэн худалдаагаар хоёрдугаарт бичигддэг “Lowe's” дэлгүүр мөн “Tesla”-ийн нарны эрчим хүчний бүтээгдэхүүнүүдийг худалдаалж эхэлж магадгүй талаар эх сурвалж мэдээлжээ.