Төмөр замаар тээсэн ачаа оны эхний таван сард 1.7 хувиар өсчээ

Төмөр замын тээврээр 2016 оны эхний таван сард 7.4 сая тонн ачаа, давхардсан тоогоор нэг сая гаруй хүн зорчиж, тээсэн ачааны хэмжээ 1.7 хувиар өссөн боловч зорчигчдын тоо 10 хувиар буурсан байна. УБТЗ-ын мэдээлж байгаагаар тавдугаар сарын уул уурхайн бүтээгдэхүүн, барилгын ачааны хэмжээ нэмэгдсэн ч бусад төрөлд буурсан үзүүлэлттэй гарсан. Тухайлбал тавдугаар сарын 24-30-ны өдрийн тээвэрт барилгын ачаа өмнөх долоо хоногоос 11.4 хувь өссөн бол уул уурхайн бүтээгдэхүүн долоо хоногийн дотор 34.2 хувиар нэмэгджээ. Төмөр замаар тээсэн нийт ачаанд эхний таван сард дотоодын ачаа 44.1 хувийг эзэлж, экспортын ачаа 32.5 хувь, импортынх 10.4 хувь, дамжин өнгөрсөн ачаа 13.1 хувийг эзэлж байна. Дамжин өнгөрсөн ачааны хэмжээ 1.4 пунктээр нэмэгдсэн нь бүх төрлийн транзит тээврийг нэмэгдүүлэхээр ажиллаж байгаа энэ үед эерэг үзүүлэлт болж байгаа юм. Ирэх долоо хоногт Монгол Улс, ОХУ, БНХАУ-ын гурван талт “Эдийн засгийн коридор” байгуулах хөтөлбөрийн төслийг батлахаар хүлээгдэж байгаа. Хөтөлбөрт гурван тал хамтран хэрэгжүүлэх дэд бүтцийн бүтээн байгуулалт буюу авто болон төмөр замын коридорууд, дамжин өнгөрөх тээвэр зэрэг 32 төсөл багтсан. Ган зам сонины мэдээлж байгаагаар Монголын хил рүү нэгдмэл стандартын төмөр зам тавьж эхэлснийг “Цеке” боомтын захиргаа өнгөрсөн Даваа гарагт зарласан юм. “Цеке” боомт нь Өвөр Монголын Алшаа аймагт оршдог ба Монгол Улсын Шивээ хүрэнгийн боомттой хил залгаа Монгол Хятадын хоорондын хоёр дахь том боомт юм. Нэгдмэл стандартын төмөр зам тавьснаар БНХАУ-ын нарийн цариг болон одоогийн Монголын өргөн царигтай замуудыг холбох боломжтой болно. “Цеке” боомтыг ирээдүйд Монгол-Хятадын хилийн хамгийн том боомт болж жилдээ 30 саяас дээш тонн ачаа нэвтэрдэг болно гэж БНХАУ-ын тал үзэж байгаа юм. Энэхүү боомт нь 1992 оноос улирлын чанартай ажиллаж байгаад 2009 онд албан ёсоор нээгдэж байжээ.

М.Дэлгэрмаа

Холбоо барих: delgermaa.m@bloombergtvmongolia.com

sodgerel.kh@bloombergtvmongolia.com