Зэс боловсруулах үйлдвэрийн төслийн хөрөнгө оруулагчийг ирэх сард шалгаруулна

Түүхий эд

Зэсийн баяжмал хайлуулах, цэвэршүүлэх үйлдвэрийн төсөл хэрэгжүүлэх хөрөнгө оруулагчийн шалгаруулалтыг ирэх долдугаар сард багтаан зохион байгуулахаар боллоо. Үүнтэй холбогдуулан Засгийн газрын ээлжит хуралдаанаар Аж үйлдвэрийн сайдад шалгаруулалтын дүнг энэ онд багтаан танилцуулах үүрэг өгсөн байна. Зэс боловсруулах үйлдвэрийн 10 хувийг Монголын Засгийн газар үнэ төлбөргүйгээр эзэмших юм. Энэ хүрээнд эрх зүйн таатай орчинг бүрдүүлэх, үйл ажиллагааг нь бүхий л талаар дэмжих үүргийг Төр хүлээх юм байна. Мөн “Оюу Толгой” компанийн хөрөнгө оруулалтын гэрээнд заасны дагуу холбогдох эдийн засгийн судалгааг эхлүүлж улмаар зэсийн баяжмал хайлуулах, цэвэршүүлэх үйлдвэрийн урьдчилсан техник, эдийн засгийн үндэслэл хэлбэрээр боловсруулах асуудлаар тус компанитай харилцан ойлголцлын санамж бичиг байгуулж ажиллахаар болжээ. Дашрамд дурдахад “Оюу Толгой” компани энэ оны I улиралд 213.1 мянган тонн баяжмал борлуулсан бөгөөд энэхүү баяжмал дахь зэсийн борлуулалтаас олсон орлого нь 202 сая ам.доллараар хэмжигдэж байгаа ажээ.

Т.Элиса

Холбоо барих: elisa.t@bloombergtvmongolia.com

sodgerel.kh@bloombergtvmongolia.com

САНАЛ БОЛГОХ