6883

Ford дэлхийн хэрэглэгчийн чиг хандлагыг тооцоолов

Авто зах зээл

Дэлхий ертөнцийг нийтэд нь хамарч буй өөрчлөлттэй уялдан хэрэглэгчдийн үзэл бодол, биеэ авч явах байдал, амьдралын үнэт зүйл, дадал заншил хувирч байна. Хэрэглэгч нь тухайн брэнд хүмүүсийн тодорхой явцуу хүрээ төдийгүй нийт нийгмийн ашиг сонирхолд хэр нийцэж байгаад анхаарах нь ихэслээ. Ford-ын тайлан нь нэр хүндтэй шинжээчдээс технологи, эдийн засаг, нийгэм, улс төрийн салбарт хийсэн задлан шинжилгээнд тулгуурлажээ. Эдгээр салбарт гарч буй шинэ чиг хандлагыг илүү үр ашигтай тээврийн хэрэгслэл, Ford дэлхийн хэрэглэгчийн чиг хандлагыг тооцоолов үйлчилгээ хөгжүүлэхэд тусган ашиглах зорилгоор Ford компани уг тайланг бэлддэг байна. Үүний тулд АНУ, БНХАУ, Их Британи, ХБНГУ, Энэтхэг, Бразил, Австрали зэрэг зах зээлд том байр эзэлдэг улсын хэрэглэгчдээс тусгай судалгаа авчээ.

Ford компани энэ оны тайландаа дэлхийн хөгжлийн ирээдүйг тодорхойлж болзошгүй хэрэглэгчийн гол чиг хандлагыг тооцоолжээ. Өргөн цар хүрээтэй эдгээр чиг хандлагын заримаас дурдвал:

-“Илүү том” байх нь “Илүү сайн” гэсэн ойлголттой тохирох нь улам ховордлоо. Үүнтэй уялдан эд баялаг эзэмших нь амжилт, аз жаргалын хэмжүүр байхаа болив. Хэрэглэгч эд хөрөнгө, бараа бүтээгдэхүүнийг эзэмшиж байгаагаасаа бус, тухайн бараа бүтээгдэхүүн амьдралд нь хэрхэн нөлөөлж байгаагаас таашаал авч сурчээ. Үнэтэй эд зүйлийн хэрэглээгээ нийгэмд харуулах нь хүмүүсийн дургүй зэвүүг хүргэдэг боллоо. Судалгаанд хамрагдсан 18-29 насны залуусын 77 хувь нь гадаад байдлаараа мөнгөтэй эрхэм болохоо харуулахыг хичээгсдэд дургүй хэмээн хариулсан байна.

-“Цаг бол алт” гэсэн үзэл бодол үнэ цэнээ алдлаа. Орчин үед цаг нарийн баримтлахыг эрхэмлэх нь хуучирсан ойлголт болох хандлагатай байна. Ажлыг хойш тавих нь ихэссэн төдийгүй хэвийн үзэгдэл болох төлөвтэй. Цаг ашиглалтын тухай ойлголт хуучнаасаа эрс хувирав. Урьд нь цаг үрсэн дэмий зүйл гэж үздэг байсан олон юмыг бас ч хэрэгтэй л юм байна хэмээн боддог болсноо судалгаанд хамрагдсан насанд хүрэгсдийн 72 хувь нь мэдэгджээ.

-Сонголт хийх төвөгтэй болов. Интернэтийн ачаар хэт их сонголттой тулгарсан хэрэглэгч эргэцүүлсээр байгаад тухайн барааг авахаа болих нь ихэслээ. Сонголт асар баялаг болсон тул байж болох бүх хувилбараас туршиж үзсээр эцэст нь аваагүй нь дээр гэсэн бодолтой хоцорно. Ford-ын судалгаанд хамрагдсан насанд хүрсэн хүмүүсийн 73 хувь нь интернэт өөрсдөд нь хэрэггүй хэт олон бараа шахаж байна хэмээн үзжээ. Гэхдээ бараа сонгох гэж байгаа бол “интернэт ухсан нь дээр” хэмээн судалгаанд хамрагдсан 18-29 настай 10 худалдан авагч тутмын найм нь хариулжээ.

-Технологийн дэвшил хүмүүсийн өдөр тутмын амьдралыг хөнгөвчилж байна уу, хүндрүүлж байна уу гэдэг нь эргэцүүлбэл зохих асуулт. Орчин үеийн технологи хүмүүсийн амьдралыг илүү тохь тухтай, үр дүнтэй болгож байгаа нь гарцаагүй. Гэхдээ л технологийн дэвшлийн сөрөг тал хэрэглэгчдэд мэдрэгдэж эхлэв. Судалгаанд хамрагдсан насанд хүрэгсдийн 47 хувь нь технологийн дэвшил зарим талаар хүмүүсийг тэнэгдүү болгосон хэмээн үзжээ. Арван хүн тутмаас зургаа нь технологийн дэвшил та биднийг “харьцаа муутай” болгосон хэмээн хариулав. Хятадын оролцогчдын хувьд арван эцэг эх бүрээс найм нь технологийн дэвшил хүүхдийн хөгжилд саараасаа илүү сайнаар нөлөөлсөн гэсэн бодолтой. Харин америкчуудын 46 хувь нь ийм бодолтой байна.

-Нийт нийгмээс гарч буй шийдвэрт өөрөө ч хариуцлага хүлээх ёстойг орчин үеийн хувь хүн гүнзгий ухамсарладаг болжээ. Тодорхой бараа бүтээгдэхүүн үйлдвэрлэх үйл явцтай холбоотой ёс зүйн асуудалд анхаарал тавих ёстойг судалгаанд хамрагдсан хүмүүсийн 86 хувь нь зөвшөөрч байгаа юм.

Уг тайланд өөр сонирхолтой олон судалгаа багтсан. Гэхдээ Дэлхийн хэрэглэгчийн ерөнхий чиг хандлагыг тусган харуулдаг ийм тайлан бэлдэхийн төлөө автомашин үйлдвэрлэгч Ford компани зардал гаргах хэрэг байна уу хэмээн асууж болох. Шалтгаан нь зарим талаар Ford-ын түүхтэй холбоотой. Тус компани тэртээх 1950-иад онд хэрэглэгчийн хэрэгцээ, шаардлагыг ойлголгүйгээр Edsel загвар гаргасан нь зах зээлд том ялагдал хүлээсэн сургамж болсон юм.

Орчин үед автомашин нь хүний амьдралын салшгүй хэсэг. Хувийн тээврийн хэрэгсэл нь гангараа илэрхийлэхээ нэгэнт больж өдөр тутмын зайлшгүй хэрэгцээ хангагч төдий болж хувирлаа. Ийм ч учраас шинэ үеийн бүх автомашин хэрэглэгчийнхээ амьдралыг хөнгөвчилсөн өдий төдий технологи шийдэлтэй болжээ.

Ford компани автомашин үйлдвэрлэгч гэсэн уламжлалт явцуу ойлголтын хүрээнд баригдалгүй, дэлхийн хэмжээнд тээвэртэй холбоотой бүхий л бэрхшээлийг шийдвэрлэгч болох зорилготой. Тээврийн хэрэгслийн талаар хүмүүст тогтсон ойлголтыг эвдэх тухай компанийн үзэл баримтлал 100 жилийн өмнөхөөсөө өөрчлөгдөөгүй. Хэрэглэгч өөрийн гэсэн автомашин эзэмших эсэхээс үл шалтгаалан нийт хүн төрөлхтний амьдралын чанарыг сайжруулах арга замыг тус компани эрэлхийлж байна.
САНАЛ БОЛГОХ
Та утсандаа UB Info апп суулгаад мэдээгээ утаснаасаа уншаарай
Засгийн газрын мэдээ